2025-yil 1-maydan 31-oktyabrgacha sohaning beshta yetakchi kompaniyasi — Maxam-Chirchiq, Swissagro, Ifoda Agro Kimyo Himoya, Indorama Kokand Fertilizers and Chemicals va Schelkova Agrohim-O‘zbekiston — bozorni qalbakilashtirish va mahsulotlarni noqonuniy olib kirishdan himoya qilish imkonini beruvchi tizimni sinovdan o‘tkazmoqda.
2026-yil 1-maydan barcha turdagi o‘g‘itlar va pestitsidlar uchun markirovkalash majburiy bo‘ladi. Ishlab chiqaruvchilar ishlab chiqarish jarayonlariga yangi texnologiyalarni joriy etishlari, hisob tizimlarini modernizatsiya qilishlari va xodimlarni o‘qitishlari kerak bo‘ladi.
Tajribaning asosiy bosqichlaridan biri Farg‘ona viloyatidagi «Swissagro» MCHJ QK maydonida uskunalarni o‘rnatish bo‘ldi. 2025-yil 11-12-avgust kunlari CRPT TURON mutaxassislari Integrated “Trade Solution ITS” MCHJ integratori bilan hamkorlikda Data Matrix kodlarini stikerlash usuli bilan kiritish bo‘yicha texnik yechimni joriy etdilar. Tizim ishlab chiqarish liniyalarining o‘ziga xos xususiyatlarini hisobga oladi va Asl Belgisi milliy axborot raqamli tizimi talablariga javob beradi.
“Swissagro” MCHJ QK — o‘simliklarni himoya qilish vositalari va murakkab o‘g‘itlar ishlab chiqaruvchi zamonaviy korxona. 2019-yilda Shveysariya, Ukraina va O‘zbekiston hamkorlari ishtirokida tashkil etilgan korxona ilg‘or uskunalar bilan jihozlangan bo‘lib, xalqaro sifat standartlariga muvofiq mahsulot ishlab chiqaradi.
