Mahsulotlarni raqamli markirovkalash va kuzatish milliy tizimi operatori “CRPT TURON” va ichimliklar ishlab chiqaruvchi “EURASIA BOTTLERS” O‘zbekistonda birinchi marta alyuminiy idishlarga raqamli kodlarni lazerli tushirish texnologiyasi joriy etilgan sanoat maydonchasiga press-tur uyushtirdi.
Tadbirda yetakchi OAV, axborot nashrlari va telekanallar vakillari ishtirok etdi. Mehmonlar ishlab chiqarish jarayoni bilan tanishib, noyob lazerli markirovkalash liniyasi qanday ishlashini bevosita ko‘rdilar. Muhbirlar texnologiya, logistika va raqamli kuzatuv kelajagi bilan bog‘liq barcha savollarga “CRPT TURON” va “EURASIA BOTTLERS” mutaxassislaridan batafsil javob olishdi.
“2024-yil 1-avgustdan alyuminiy idishdagi mahsulotlarni o‘z ichiga olgan ikkinchi guruhdagi suv va salqin ichimliklarni majburiy markirovkalash boshlandi. 2025-yilning birinchi choragida 130 million donadan ortiq alyumin idishdagi mahsulotlar markirovka qilindi, bu esa suv va salqin ichimliklar ishlab chiqaruvchilarning yuqori tayyorgarligidan dalolat beradi. Ikkinchi bosqichda bizni 2025-yil 1-maydan boshlab markirovkalash jarayoni to‘g‘risidagi hisobot elektron shaklda kutmoqda,” – dedi “CRPT TURON”ning “Suv va salqin ichimliklar” mahsulot guruhi menejeri Dilso‘z Akrobjonova.
Press-tur davomida mutaxassislar alyumin bankaning qopqog‘iga lazerli qo‘llash usuli bozordagi texnologik jihatdan eng murakkab yechimlardan biri ekanligini ta’kidladilar, chunki bankaning yuzasi cheklangan va doimiy harakatda bo‘ladi.
“Biz raqamli kodni idish yopilishidan oldin – lazer yordamida va alohida ishlab chiqarish liniyasida qo‘llash imkonini beruvchi yechimni amalga oshirdik. Bu ishlab chiqarish tezligiga ta’sir qilmaydigan va qo‘llash mustahkamligini ta’minlaydigan “aqlli” texnologiya,” – deya izoh berdi uskunalarni texnik integratsiya qilishda ishtirok etgan “Callisto” kompaniyalar guruhi bosh direktori Pavel Bulgakov.
“EURASIA BOTTLERS” zavodi direktori Yuriy Nuritdinov raqamli markirovkani joriy etish nafaqat qonunchilik talablariga javob berish, balki xaridorlarning ishonchiga sarmoya kiritish ekanligini ta’kidladi:
“Flash ichimligining har bir idishi endi individual kod bilan ta’minlangan. Xaridor mobil ilova orqali mahsulotning haqiqiyligini bir zumda tekshirishi mumkin. Bu qalbakilashtirishdan himoyani kuchaytiradi va yetkazib berishni zavoddan do‘kongacha shaffof qiladi.”
Raqamli markirovkalash “Asl Belgisi” tizimi orqali amalga oshiriladi. “CRPT TURON” tomonidan shakllantirilgan noyob kodlar logistika zanjirining barcha bosqichlarida kuzatib boriladi. 2025-yil 1-maydan boshlab bozor ishtirokchilari yangi bosqichga – markirovkalangan mahsulot aylanmasi bo‘yicha elektron hisobotga o‘tadilar.
