2024-yil 5-dekabr kuni Toshkent shahrida «Kelajak buxgalteri» ikkinchi amaliy buxgalteriya konferensiyasi bo‘lib o‘tdi. Tadbirda buxgalteriya hisobi, soliq huquqi va audit sohasi mutaxassislari, shuningdek, biznes vakillari va ekspertlar ishtirok etdi.
Konferensiya ma’ruzachilaridan biri «CRPT TURON» MCHJ Milliy raqamli markirovkalash operatori rivojlanish bo‘yicha direktori Fazliddin Saydullayev bo‘ldi. Taqdimotda u 2024-yil 1-noyabr va 2025-yil 1-yanvardan kuchga kiradigan mahsulotlarni raqamli markirovkalash qoidalarini joriy etish mavzusini ochib berib, ushbu yangiliklarni qo‘llashning amaliy jihatlariga e’tibor qaratdi.
Nutq davomida «CRPT TURON» MCHJ eksperti O‘zbekistonda yashirin iqtisodiyotning ko‘lamini ta’kidladi. Taqdim etilgan ma’lumotlarga ko‘ra, 2023-yilda yashirin yalpi qo‘shilgan qiymat hajmi 422,9 trln so‘mga yetgan va davlat byudjetining yillik yo‘qotishlari 30 trln so‘mni tashkil etadi. Ushbu muammoni hal etish vositalaridan biri – raqamli markirovka va mahsulot aylanmasini monitoring qilish milliy tizimidir.
Spikerning ta’kidlashicha, raqamli markirovka ishlab chiqarish va mahsulot aylanmasini monitoring qilish uchun zarur bo‘lgan barcha bosqichlarni qamrab oladi, bu esa bozor shaffofligini oshirish va noqonuniy sektorni qisqartirishga yordam beradi.
Konferensiya raqamli markirovkani joriy etish bilan bog‘liq o‘zgarishlar va ularning buxgalterlar va umuman biznes hamjamiyati ishiga ta’sirini muhokama qilish uchun muhim maydonga aylandi. Ishtirokchilar bo‘lg‘usi yangiliklar va ularni qo‘llash bo‘yicha amaliy tavsiyalar haqida dolzarb ma’lumotlarga ega bo‘ldilar.
